Poslovne vijesti - Makedonija

Од 1 јули се укинува стариот систем на е-Даноци

Уште 15 дена до истекот на рокот за 5.481 фирми да се регистрираат и 12.059 да мигрираат на новиот систем на е-Даноци.

Пред почетокот на новата законска обрска за задолжително користење на електронските сервиси на УЈП, 5.481 тримесечни ДДВ обврзници сеуште не се регистрирале на системот е-Даноци.

На фирмите им преостануваат уште 15 дена да ги преземат неопходните чекори, за да можат од 1 јули 2013 година непречено да пријавуваат данок преку интернет сервисот на УЈП.

Од 1 јули 2013 година, со стапувањето на сила на задолжително електронско пријавување на ДДВ и данок на добивка за ДДВ обврзниците, на шалтерите во УЈП повеќе нема да се примаат ДДВ-пријави и Даночни биланси за данок на добивка во хартиена форма.

Доколку фирмите не се прилагодат на новините во даночното работење, истите нема да можат навреме да ја поднесат ДДВ-пријавата во УЈП, за што е предвидена глоба која достигнува до 3.500 евра во денарска противвредност.

Дури 12.059 правни лица и самостојни вршители на дејност кои моментално се корисници на стариот систем на е-Даноци, задолжително ќе треба да мигрираат на новиот систем на електронски услуги на УЈП, во спротивно од 1 јули 2013 година нема да можат да ги користат е-даночните услуги.

Постапката за миграција е едноставна и се врши електронски преку веб страницата.

По 1 јули, стариот систем на е-Даноци ќе биде ставен надвор од функција, а електронските услуги на УЈП ќе бидат достапни само преку новиот и надграден систем на е-Даноци.